「厚多士」勁吸收視大破舊形象

馬德鐘搭徐子珊火花啪啪聲，兩人在TVB新劇《以和為貴》分別飾演爛撻撻調解員及小師奶發揮搞笑本色，最高收視有成28點，難得收視好，台前幕後勁驚喜！馬神跟《頭條日報》記者傾談時興奮說：「呢套戲洗脫咗我神級隔膜，『厚多士』（劇內角色名）幫我成功入屋！多咗師奶Fans！」問他會否效法子珊挾住優勢同無綫拗數，除要求加薪15%，仲要度身訂造角色兼拎埋視帝呢？馬神笑道：「人工梗係要加，而獎項係錦上添花啫，識諗之後都唔再介懷啦！」

[img]http://www.groupdrama.com/wp-content/uploads/2015/03/27ME004_.jpg[/img]

2006年馬德鐘憑TVB劇《鳳凰四重奏》「余賜」一角大受歡迎，叫胡拎視帝，最終飲恨輸畀鄭嘉穎。今年一月轉簽內地經理人合約的他，去年拍完《以》就同合作21年嘅TVB結束賓主關係。點知告別作竟有新驚喜：「真係估唔到反應咁好，我相信好睇監製林志華同編劇嘅功力，其實調解員未必出位，不過，憑佢哋加入咗爛仔背景，配合肢體語言，比如出劍指、加插古裝對白等，多方面配合下令到角色更立體同更好睇！『厚多士』仲幫到我拉近同觀眾距離，以前只局限於《飛虎》角色，個個都驚咗神級高大嘅展Sir，但最近竟然有好多街坊主動同我say hi！又稱呼我做超級調解員，幾驚喜。」

馬神自言有喜劇細胞，還自爆拍《飛虎》時成日臨場度出惡搞場口，台前幕後笑爆嘴，唔排除咁惹起監製注意：「因為我有好多諗法，好多同徐子珊嘅對白都係即場度。我仲將『巫瑞薏』設定做一個完美女人，觀眾睇落會明白同鍾意佢，希望帶畀觀眾有個深刻印象。今次同成班演員合作得好開心，好和諧，我仲開工前發起食飯，增加演員之間嘅溝通。」問到可有期望開續集？馬神坦承冇所謂，但要同TVB再洽談合約。